يا نديم الجرح واللي وصتك بارقامها = عارف انك ما تعرف الا شذى يشمومها
لا تعلمني عن اخر ما حصل فيامها = من رسالتها عرف اليوم كل اعلومها
ادري ان الوقت شمر عن ايديه وضامها = وادري ان الحظ الاقشر صار مثل هدومها
وادري ان الهم وقف في طريق احلامها = لين صار الحزن اثرها والشقا مقسومها
بس تستاهل هي اللي طاوعت من لامها = وباعت اللي كل ذنبه ما دخل في سومها
خلها تدفع ثمن غلطاتها ما دامها = هملت قلبي وراحت واسرفت في حومها
ويبتعد مع كل خطوه صوت وقع اقدامها = وتقرب الضيقه وتصحى دمعتي من نومها
لين غابت عن عيوني وانجلى هندامها = ليلة تغفى على صدر الظلام انجومها
كنت احس بشي والله ما تشيل اعضامها = لو تحس بشي منه يمر وسط احلومها
كنت احس ان الضلوع العوج مثل ايتامها = واشعر ان القلب نبضة منتهي من يومها
والحياة اللي تدور اشهورها واعوامها = وقفت واليوم دور ارماحها واسهومها
يا كثر ما اغرقت نفسي في بحور اوهامها = ويا كثر ما ضعت بين اهوامها واهمومها
ما جداي الا احلم اني واقف قدامها = واتخيلها تعاتبني واروح الومها
يا نديم الجرح خلك من اعلوم ايامها = ما بقى للعمر بالقلب رغبة يلتفت لعلومها
والرسالة ردها للي زمنها ضامها = وقلها كلمة وتفهمها حسب مفهومها
والله ان اقص كفي قبل ادق ارقامها = والله اني اشيل قلبي قبل اشيل همومها

من روائع الشاعر فهد المساعد

أتمنى أن تستلذ لها ذائقتكم

أخوكم : قـــلـــبـــي أنـــا